ဓမ္မပဒအတွေးအမြင် - ၁၃
#တရားနဲ့နေသူဟာ
ဒီဘဝရော နောက်ဘဝပါ
ချမ်းချမ်းသာသာ နေရပါတယ်။
လောကကြီးကို အကျဉ်းချုပ်လိုက်ရင်
ရုပ်နဲ့ နာမ်ပဲ ရှိပါတယ်။
လောကကြီးရဲ့
သိပ်ရှုပ်ထွေးတဲ့ ဖြစ်စဉ်တွေဟာလည်း
မွေး အို နာ သေ မွေး ... စက်ဝိုင်းထဲမှာ
ထပ်ခါထပ်ခါ လည်ပတ်နေတာပါပဲ။
နာမည်တွေ ဘယ်လိုခွဲခြားသတ်မှတ်ထားပါစေ၊
တကယ်တမ်းတော့
လောက ဟာ ဖြစ်-ပျက် ပါပဲ။
#ရုပ်နာမ်အစုအဝေးဖြစ်တဲ့ ဟောဒီလောကမှာ
လူမိုက်တွေဟာ
(စွဲလမ်းစိတ်နဲ့ အငမ်းမရ)
ပူပန်နွမ်းလျ နစ်မြုပ်ကြပါတယ်။
(ရုပ်နာမ်နှစ်ပါး သဘောတရားကို ခွဲခြားသိမြင်)
ပညာရှိသူတော်စင်တွေမှာ
ငြိကပ်စွဲလမ်းတာ မရှိပါဘူး။
လောကမှာ နေရင်တော့
လောကဓံတွေ ခံရမှာပါပဲ။
မေ့မနေနဲ့လေ၊
မမြဲခြင်းအရိပ်ဆိုးတွေ ---
#ဟိုအရင်က မေ့လျော့ခဲ့ပေမယ့်
နောင်အခါမှာ မမေ့လျော့သူ၊
ပြုခဲ့ပြီးတဲ့ မကောင်းမှုအကုသိုလ်ကံကို
ကောင်းမှုကုသိုလ်ကံနဲ့
ပိတ်ဆို့တားမြစ်သူဟာ
တိမ်တိုက်ကလွတ်မြောက်လာတဲ့ လမင်းကြီးလို ဒီလောကကို
ထွန်းလင်းတောက်ပစေပါတယ်။
#ပညာရှိပဲ ဒါနကို
ဝမ်းသာကြည်ဖြူ သာဓုခေါ်နိုင်ပါတယ်။
#သစ္စာတရားကို ကျော်လွန်ပြီး
မဟုတ်မမှန် ပြောဆိုတတ်တဲ့၊
တမလွန်လောကကို
(ဖြစ်ချင်ရာဖြစ် လုံးဝ ထည့်မစဉ်းစားဘဲ)
လွှင့်ပစ်ထားသူအတွက်
မပြုလုပ်နိုင်တဲ့ မကောင်းမှုဆိုတာ
မရှိတော့ပါဘူး။
(နောက်ဘဝမယုံသူဟာ
မကောင်းတာအကုန် လုပ်ရဲပါတယ်။)
#ဒီလောကဟာ အကန်းပါပဲ။
ဒီလောကမှာ (ဝိပဿနာဉာဏ်မျက်စိနဲ့)
အထူးကြည့်ရှုသိမြင်သူဟာ
သိပ်နည်းပါးပါတယ်။
ပိုက်ကွန်မှာမိနေတဲ့ငှက်
လွတ်ထွက်ဖို့ခက်သလို၊
လောက က လွတ်ထွက်ဖို့ ခက်ပါတယ်။
မြတ်ဗုဒ္ဓ အစရှိတဲ့ သူတော်ကောင်းတွေဟာ
လောက ကနေ လွတ်ထွက်နိုင်ကြပါတယ်။
လောကကို လွန်မြောက်နိုင်ကြပါတယ်။
လောကထက် သာလွန်မွန်မြတ်ကြပါတယ်။
လမင်းဟာ ညခင်းကို အလှဆင်သလို၊
မြတ်ဗုဒ္ဓနဲ့ သူတော်ကောင်းတွေဟာ
မှောင်မိုက်နေတဲ့ အကန်းလောကကြီးကို
အေးအေးမြမြ အလင်းရောင်ပေးကြပါတယ်။
(ရည်ညွှန်းကိုးကား - ဓမ္မပဒ၊ လောကဝဂ္ဂ)
အရှင်ဉာဏဝရ(ပါရမီ)
No comments:
Post a Comment