ဓမ္မပဒအတွေးအမြင် - ၂၄
နိဗ္ဗာန်လို - တဏှာဖြို။
ပိန်းကြာရွက်တွင် ရေမတင်၊
သူတော်မြတ်တွင် တဏှာစင်။
#ရေစက်ရေပေါက်ဟာ ကြာရွက်မှာ
လျှောကျသလိုပါပဲ။
လောကမှာ လွန်ဆန်ဖို့ခက်ခဲတဲ့ တဏှာယုတ်ကို
လွှမ်းမိုးနှိပ်ကွပ်နိုင်သူမှာ
စိုးရိမ်သောကတွေလျှောကျကုန်ပါတယ်။
#သတ္တဝါတွေဟာ
ကာမချမ်းသာကို သာယာမှီခိုနေကြတာဖြစ်လို့
ကာမချမ်းသာကို ရှာဖွေကြရပါတယ်။
တဏှာစေရာ မနေသာ ဖွေရှာဆက်ရသူတွေဟာ
မွေး အို (နာ သေ--) ဒုက္ခတွေ ရောက်ကြရပါတယ်။
#တဏှာဝန်းရံထားတဲ့ သတ္တဝါတွေဟာ
ကျော့ကွင်းမှာ နှောင်ဖွဲ့ခံရတဲ့ယုန်လေးလို
ထိတ်လန့်ကြောက်ရွံ့နေကြရပါတယ်။
(ကာမ ရာဂ စတဲ့) သံယောဇဉ်အစေးနဲ့
ကပ်ငြိသူတွေဟာ
အကြာကြီး ထပ်ခါထပ်ခါ
ဆင်းရဲဒုက္ခမှာ ကပ်ရောက်ကြရပါတယ်။
တဏှာတောမှာ မောသင့်ပါပြီ။
မေ့လျော့လေ - တဏှာပွားလေ၊
တဏှာပွားလေ - သောကပွားလေ။
ပညာမဲ့ဥစ္စာ တဏှာဆိပ်သင့်။
မစွဲလမ်းရင် မစိုးရိမ်ရပါဘူး။
သံလက်ထိပ်ထက် ရွှေလက်ကောက်က ပိုကြပ်ပါတယ်။
သံမဏိကြိုးထက် သံယောဇဉ်ကြိုးက ပိုခိုင်တုပ်ပါတယ်။
မမြင်ရတဲ့ အခိုင်ဆုံးကြိုးကို ဖြတ်တောက်ပါ။
မထင်ရတဲ့ အကျဉ်းဆုံးထောင်ကို ဖောက်ထွက်ပါ။
တဏှာပိုက်ကွန်ယက်မှာ ရုန်းမထွက်နိုင်တော့ပါ။
တဏှာမြစ်မှာ နစ်မြုပ်တာ။
တဏှာဖြတ်မှ ဒုက္ခပြတ်မှာ။
စွန့်လွှတ်မှ ဒုက္ခဇာတ်သိမ်း၊
မစွဲလမ်းမှ ငြိမ်းချမ်း၊
မတွယ်တာမှ ချမ်းသာရ။
အတွေးဆိုးတွေ ငြိမ်းအေးစေ၊
အသုဘပွား သတိထားနေ။
တဏှာလည်းသတ်၊ စာလည်းတတ်၊ မဟာပုဂ္ဂိုလ်မြတ်။
#တရားအလှူဟာ အလှူအားလုံးကို အောင်နိုင်ပါတယ်။
တရားအရသာဟာ အရသာအားလုံးကို
အောင်နိုင်ပါတယ်။
တရားနဲ့ပျော်မွေ့တာဟာ ပျော်ရွှင်ခြင်းအားလုံးကို
အောင်နိုင်ပါတယ်။
တဏှာကုန်ရာ အရဟတ္တဖိုလ်ဟာ ဆင်းရဲအားလုံးကို အောင်နိုင်ပါတယ်။
တရားအလှူဟာ အမြတ်ဆုံးပါ။
တရားအရသာဟာ အကောင်းဆုံးပါ။
တရားပျော်မွေ့ခြင်းတာ အမွန်မြတ်ဆုံးပါ။
တဏှာကုန်မှ ဒုက္ခငြိမ်းမှာ။
ကောင်းမှုမျိုးကို စိုက်ပျိုးရာ အနှိုင်းမဲ့လယ်ယာမြေဖြစ်တော်မူသည့်
ဘုရားအမှူးရှိသော သံဃာတော်အပေါင်း။
#ပေါင်းမြက်ဟာ လယ်ယာစိုက်ပျိုးခင်းတွေကို
ဖျက်ဆီးပါတယ်။
ရာဂ ဒေါသ မောဟ ဟာ ဒီသတ္တဝါတွေကို ဖျက်စီးပါတယ်။
ဒါ့ကြောင့်
ရာဂ ဒေါသ မောဟကင်းတဲ့ ပုဂ္ဂိုလ်တွေမှာ
ပေးလှူတာဟာ အကျိုးကြီးမားလှပါတယ်။
(ရည်ညွှန်းကိုးကား - ဓမ္မပဒ၊ တဏှာဝဂ္ဂ)
ငါ တို့နေရာ ဤကမ္ဘာ၊ တဏှာအုပ်စိုးသည်။
တဏှာစေရာ မနေသာ၊ ဖွေရှာဆက်ရသည်။
ရသည့်ဥစ္စာ ချစ်သူပါ၊ စွန့်ခွာသွားရသည်။
တကယ့်အရေး တကယ့်ဘေး၊
ဘယ်သွေးဘယ်သား မကယ်ပြီ။
ငါနှင့်ရွယ်တူ ငါ့အောက်လူ၊
ကြီးသူ သေကြ များလှပြီ။
ခဏမစဲ အိုစမြဲ၊ ကိုယ်လည်း သေဘက်နီးခဲ့ပြီ။
ဇရာမီးတောင် ကိုယ်ထဲလောင်၊
သေအောင်မြိုက်တော့သည်။
မသေရခင် သွားလမ်းစဉ်၊
ကြိုတင်ပြင်သင့်သည်။
ဒါန၊ သီလ၊ ဘာဝနာ လမ်းသာတွင်လိမ့်မည်။
မဂ္ဂင်ယာဉ်ကြီး အမြန်စီး၊ ခရီးထွက်တော့မည်။
(မဟာဂန္ဓာရုံဆရာတော်ကြီး)
No comments:
Post a Comment