သဗ္ဗတ္တက ကမ္မဋ္ဌာန်း
**************
၁- ဗုဒ္ဓါနုဿတိဘာဝနာ-အရဟံဂုဏ်တော်
၂-မေတ္တာဘာဝနာ
၃-မရဏဿတိ-အသုဘ
အထက်ပါကမ္မဌာန်းနည်းများသည်သဗ္ဗတ္တက ကမ္မဌာန်းဖြစ်ပြီး
အကျိုးကျေးဇူးအားလုံးရပါသည်။
အခါခပ်သိမ်း နေရာတကာ ပွါးများရတဲ့ကမ္မဌာန်းပါ။ စတုရာ ရက္ခတရားလေးပါး အစောင့်အရှောက်ကြီးလေးပါးလို့လည်းခေါ်ပါသည်။ဘယ်ကမ္မဋ္ဌာန်းကိုပဲ အားထုတ် အားထုတ် ဒီကမ္မဌာန်းကိုတော့လက်မလွတ်သင့်ပါဘူး။ပထမဆုံးပွါးများသင့်ပါတယ်။ပြီးမှ ကိုယ်အားထုတ်နေကျ ကမ္မဋ္ဌာန်းကို အားထုတ်ပါ။
အားထုတ်နေကျကမ္မဋ္ဌာန်းကိုတော့ ပါရိဟာရိယကမ္မဋ္ဌာန်း လက်စွဲကမ္မဋ္ဌာန်း ပင်တိုင်စွဲမြဲရှု ပွါးတဲ့ ကမ္မဋ္ဌာန်းလို့ခေါ်ပါတယ်။
ကမ္မဋ္ဌာန်းပွါးများအားထုတ်တဲပုဂ္ဂိုလ်တိုင်းပုဗ္ဗကိစ္စကိုတော့ နေ့စဉ်တိုတိုတုတ်တုတ် လောက်တော့လုပ်ရပါတယ်။
ကာယကံ ဝစီကံ မနောကံ အပြစ်တစ်ခုခုခံ နေရင် လည်း
တရားကဘယ်လိုအားထုတ်အားထုတ် မရပါဘူး။ဒါကြောင့် လုပ်ငန်းခွင်ဝင်တဲ့အခါ သူ့ ဆိုင်ရာစည်းကမ်းနည်းလမ်းတွေကို လိုက်နာရပါတယ်။
ဗုဒ္ဓါနုဿတိဘာဝနာ
***************
ဒီနေရာမှာ ဘုးရားဂုဏ်တော်ပွါးများပုံကို တင်ပြသွားမှာဖြစ်ပါတယ်။ဂုဏ်တော်ပွါးရာမှာ ဝတ်ကျေတန်းကျေမဟုတ်ပဲ စူးစူးစိုက်စိုက်ပွါးဖို့လိုပါတယ်။
ပုံတော်တင်စိတ်မရောက်စေပဲ ဂုဏ်တော်ထိ ရောက်အောင်ပွါးရမှာပါ။ဂုဏ်တော်ကိုးပါးမှာလည်း အရဟံ ဂုဏ်တော်သာလျှင် အရေးအကြီးဆုံးပါ။
ဥပမာ အရဟံဂုဏ်တော်ဆိုရင် ကိလေသာအားလုံးကို ဝါသနာအငွေ့အသက်ပါမကျန် ပယ်သတ်တော်မူသော အရဟံဂုဏ်တော်ရှင်ဖြစ်ပါပေ၏။
လူမင်းနတ်မင်းဗြဟ္မာမင်းတို့ဝပ်ဆင်းကော်ရော် ပူဇော်အထူးကိုခံတော်မူထိုက်လို့အရဟံမည်တော်မူထိုက်ပေ၏။
စသဖြင့် ဂုဏ်တော်အဓိပ္ပါယ်ထိအောင် ဆင်ခြင်ရပါတယ်။ပါးစပ်ကမရွတ်ရပါဘူး။ ကျန်တဲ့ဂုဏ်တော်ရှစ်ပါးလည်းဒီအတိုင်ပါပဲ။
ဒီလိုဆင်ခြင်ပွါးများရင်း ဘုရားရှင်ကြွလာတာ ရဟန္တာတွေကြွလာတာ ဖူးရနိုင်သော်လည်း အထူးအာရုံမစိုက်ရပါ။မြင်ကာမတ္တရှိပါစေ။ပွါးရမှာကဂုဏ်တော်ပါ။
အပြင်ကအသံတွေကြားရလည်း ကြားကာမတ္တထားပါ။
ကမ္မဋ္ဌာန်းရှုမှတ်ပွါးများတယ်ဆိုတာ ကာယကံအလုပ် ဝစီကံအလုပ်မဟုတ်ပါဘူး။ မနောကံအလုပ်မိုလို့မရွတ်ရပါဘူး။ပုတီးစိပ်တာတွေမပါရပါဘူး။
ရွတ်နေကျတွေခဏဘေးဖယ်ထားပါ။ အကောင်းကတော့အကောင်းချည်းပါပဲ။သူအချိန်နဲ့သူမို့သာခဏ ဖယ်ခိုင်းတာပါ။ ဗုဒ္ဓါနုဿတိကမ္မဋ္ဌာန်းဆိုတာ နိမိတ်ပေါ်စေတဲ့ ကမ္မဌာန်းမျိုးမဟုတ်ပါဘူး။ပုံတော်အရောင်တွေပေါ်လာတယ်ဆိုရင် ဂုဏ်တော်ပွါးတယ်မခေါ်ပါဘူး။ဝဏ္ဏကသိုဏ်းလေးမျိုးထဲက တစ်ခုခုရောက်သွားတာပါ။ ဒါကြောင့် ဘုရားကြွလာပြီဆိုပြီး ငေးမောကြည်ညိုမနေပါနှင့်။နိမိတ်မထင်ကောင်းတဲ့ ကမ္မဋ္ဌာန်းပါ။ပီတိ ပဲဖြစ်ရတာပါ။ဂုဏ်တော်ပွားလို့ရလာတဲ့ပီတိကလည်း တန်ဖိုးမဖြတ်နိုင်ပါ။ဇမ္ဗူဒိပ်တစ်ကျွန်းလုံးမှာ ဘုရင်မင်းဖြစ်ရတာထက် သာလွန်မြင့်မြတ်တယ်လို့ သီလ က္ခန်အဋ္ဌကထာမှာလာရှိပါတယ်။
ဗုဒ္ဓေါ ဗုဒ္ဓေါတိ ကိတ္တယန္တဿ။
ကာ. ယေ ဘဝတိ ယာပီတိ။
ဝရမေဝ ဟိ သာ ပီတိ။
ကသိဏေနာပိ ဇမ္ဗုဒီပဿ။
လောဘ ဒေါသမောဟ မာန ဒိဋ္ဌိ ဝိစိကိစ္ဆာ စတဲ့ကိလေသာတွေမရှိတာ အရဟံ =ကိလေသာအပူအညစ်တွေ ကင်းရှင်းတော့ အားလုံးက ပူဇော်ကြမြတ်နိုးကြတာပေါ့။
ဘုရားပုရိနိဗ္ဗာန်စံသွားတာ နှစ်ပေါင်းနှစ်ထောင့်ငါးရာကျော်ပေမဲ့ခုထိပူဇော်လို့မရကြသေးတာဟာ အရဟံဂုဏ်တော်ကြောင့်ပါ။
ရွှေတိဂုံစေတိတော်ကြီးမှာ တစ်နေ့တစ်နေ့လှူဒါန်းကြတဲ့ ဆွမ်းပန်း ရေချမ်း ဆီမီးဖိုးတွေဟာ တစ်သိန်းကပါ့မလား။
အဲ့ဒါ အရဟံဂုဏ်တော်ကြောင့်ပေါ့။
ဒါကြောင့် ဂုဏ်တော်ပွါးတဲ့သူဟာ ဂုဏ်တော်ရဲ့ ပါဠိရောအနက်ပါ ကျက်မှတ်ထားရမှာပါ။ရွတ်ဖက်နေတယ်ဆိုရင် အန္တရာယ်လည်းပ လာဘ်လာဘ လည်းရ အားလုံးကောင်းတာပေ့ါ။
အရံဟံဂုဏ်တော်ပွါးမယ်ဆိုရင် ထွက်လေဝင်လေ ထွက်တိုင်းဝင်တိုင်း
ရှူတယ်....အရဟံ
ရှိုက်တယ်....အရဟံ
ဘယ်လှမ်းတယ်...အရဟံ
ညာလှမ်းတယ်...အရဟံ
ရေသောက်တယ်...အရဟံ
စားတယ်ဝါးတယ်....အရဟံ
လို့ နိုင်ငံကျော်မဟာ ကမ္မဋ္ဌာနာစရိယမောင်းထောင်မြေဇင်းတောရဆရာတော်ဘုရားကြီးမှနည်းပေးဟောပြထားပါတယ်။လျောင်းထိုင်ရပ်သွား ဣရိယာပုတ်လေးပါးလုံး တရစပ် အရဟံမချရပါဘူး။အင်မတန်ချမ်းသာပါတယ်။အကျိုးလည်းအင်မတန်များပါတယ်။
သက်တော်ထင်ရှား ရှိတဲ့ မြတ်စွာဘုရားရှင်လိုစိတ်ထားနိုင်ရင် အကျိုးပေးလည်းအတူတူပဲတဲ့။
အားရစရာကြီးပါလား။
မြတ်စွာဘုရားရှင် လက်ထက်တော်က သတင်းစကားတစ်ဆင့်ကြားနှင့် ဟို သာဝတ္ထိနှင့် ယူဇနာ ၁၂၀ဝေးတဲ့ ကုက္ကုဋဝတီ နေပြည်တော် ကနေပြီး မဟာကပ္ပိနမင်းကြီးနှင့် အမတ်တစ်ထောင် မြင်းစီးပြီးလာကြတာ ရှေနားမှာမြစ်ကြီးတစ်စင်းတွေ့ ဘယ်မှာမှ ကူးလို့မရတော့ဘူး။
အဲဒီတော့မဟာကပ္ပိနမင်းကြီးက ဘုရားဂုဏ်တော်တွေ ဆင်ခြင်ပြီးသစ္စာဆိုလိုက်တယ်။
ဘဝသောတံ ဟဝေ ဗုဒ္ဓေါ
တိဏ္ဏော လောကန္တဂူ ဝိဒူ
ဧတေန သစ္စဝဇ္ဇေန
ဂမနံ မေ သမိဇ္ဈတု။
အဲ့ သလိုဆိုပြီး မြစ်ကြီးကိုဖြတ်သွားလိုက်တာ မြင်းခွါတောင်ရေမစိုဘူး။
နောက်တစ်ခါ မြစ်ကြီးတစ်ခုတွေပြန်တော့ တရားဂုဏ်။ နောက်တစ်ခါတွေ့တော့ သံဃာ့ဂုဏ် အာရုံပြု သစ္စာဆိုကူးတာပဲ
အဲသလို သဒ္ဓါ ဝီရိယရှိတဲ့ ပုဂ္ဂိုလ်တွေ ဆိုတော့ ဘုရားရှင်ကိုယ်တိုင် ယူဇနာ၁၂၀ခရီးကြွလာပြီး အကြိုတော်ထောက် ချီးမြှောက်တော်မူရတယ် ဆိုမဟုတ်လား.? ကဲ ကြိုးစားပွားကြ။
Ashin Zawana
မကြီးကန်တောရဆရာတော်အရှင်ဇ၀န
No comments:
Post a Comment