Wednesday, January 21, 2015

ဗုဒ္ဓဂယာ သံဝေဇနိယလေးဌာနဘုရားဖူး ၈

ဗုဒ္ဓဂယာ သံဝေဇနိယလေးဌာနဘုရားဖူးခရီးစဉ်မှ ထူးခြားသောအသိအမြင်များ ၈
အမျိုးသမီးများ၏ကဏ္ဍကို မြှင့်ပေးသော ဗုဒ္ဓမြတ်စွာ၊ ဘိက္ခုနီသာသနာ စတင်ခဲ့ရာ ဝေသာလီ


ကုသိနာရုံသည် ဥတ္တရာပရာဒေ့ရ်ှပြည်နယ်၌ တည်ရှိပြီး ပတ္တနားမြို့သည် ဗီဟာပြည်နယ်၌ တည်ရှိသည်။ ဥတ္တရာပရာဒေ့ရ်ှပြည်နယ်၏ နယ်နိမိတ်ကို ကျော်လွန်လာခဲ့ပြီးနောက် ဗီဟာပြည်နယ်ထဲသို့ စတင် ဝင်ရောက်ကတည်းက လမ်းများအလွန်ကြမ်းသည်။ ဝေသာလီမြို့သို့ မရောက်မီ ဗုဒ္ဓသပိတ်တော်ကိုဌာပနာထားသော စေတီတော်ကြီးကို ကားလမ်းနံဘေးတွင် ဖူးတွေ့ရသည်။ အလွန်ကြီးမားသော စေတီတော်ကြီးဖြစ်သည်။ နေ့လယ်စာကို ကားပေါ်တွင် ပါလာသော မြန်မာထမင်းဟင်းများဖြင့် လမ်းဘေးရှိ စားသောက်ဆိုင်တွင် ဝင်ရောက်စားသောက်ကြသည်။ နေ့လယ် (၁)နာရီခန့်တွင် ဝေသာလီသို့ရောက်သည်။
ရှေးဦးစွာ ဝေသာလီပြည် မဟာဝုန်တောရှိ ကူဋာဂါရကျောင်းတော်ကြီး တည်ရှိခဲ့သောနေရာသို့ သွားရောက် ဖူးမြော်ကြသည်။ ဘုရားရှင် ပဉ္စမမြောက် ဝါကပ်သီတင်းသုံးတော်မူရာဌာန၌ တည်ထားသော စေတီတော်ကြီးကို ဖူးတွေ့ ရသည်။ အနီးတစ်ဝိုက်၌ ရဟန္တာစေတီများဟု ယူဆရသော အုတ်ခုံအဝိုင်းများလည်း တွေ့ရသည်။ အသောကမင်းကြီး စိုက်ထူခဲ့သော ကျောက်တိုင်များအနက် အကောင်းပကတိတည်ရှိနေသည့် တစ်ခုတည်းသော ကျောက်စာတိုင် လည်းတည်ရှိသည်။ ကျောက်စာတိုင်ထိပ်တွင် ခြင်္သေ့ရုပ်ရှိသည်။ ဝေသာလီပြည်တွင် ကပ်ဆိုက်စဉ်က လိစ္ဆဝီမင်းများက ပင့်လျှောက်ကြ၍ ဘုရားရှင်ကြွရောက်တော်မူပုံ၊ ပေါက္ခရဝဿမိုးကိုရွာစေတော်မူပုံ၊ ရတနသုတ် ပရိတ်တရားတော်ကို ဟောကြားတော်မူပုံတို့ကို အာရုံပြု၍ ဗုဒ္ဓါနုဿတိဘာဝနာပွားများပြီး “ရတနသုတ်”ကို ရွတ်ဆို ပူဇော်သည်။ ဝေသာလီရှိ ကူဋာဂါရကျောင်းတော်သည် ဘုရားရှင် ပဉ္စမမြောက်ဝါ၌ ဝါဆိုသီတင်းသုံးတော်မူရာ ဌာနဖြစ်သည်။ မိထွေးတော်ဂေါတမီ အမှူးပြုသော သာကီဝင်မင်းသမီး(၅၀၀)တို့ကို ဘိက္ခုနီအဖြစ် ခွင့်ပြုတော်မူရာ ဌာနလည်းဖြစ်၍ ဘိက္ခုနီသာသနာ စတင်ပေါ်ပေါက်ရာဌာနလည်းဖြစ်၏။ အိန္ဒိယထုံးစံအရ ခေတ်အဆက်ဆက် အနှိမ်ခံခဲ့ရသော အမျိုးသမီးများကို အမျိုးသားများနှင့် တန်းတူအခွင့်အရေးပေးကာ ဘိက္ခုနီသံဃာအဖွဲ့အစည်းကို တည်ထောင်တော်မူခဲ့ရာ ဌာနဖြစ် သောကြောင့် အမျိုးသမီးများ မမေ့သင့်သောနေရာဖြစ်သည်။


ကူဋာဂါရကျောင်းဝန်းရှိ စေတီတော်ကြီးကို ဖူးမြော်ကန်တော့ပြီးနောက် ဘုရားရှင်က မိထွေးတော်ဂေါတမီ ထေရီမကြီးအား ထိုကျောင်းတော်တွင် ဟောကြားတော်မူခဲ့သော အင်္ဂုတ္တရနိကာယ်၊ အဋ္ဌကနိပါတ်လာ “သံခိတ္တသုတ်”ကို အမှတ်တရ ရွတ်ဆိုပူဇော်ခဲ့သည်။ စေတီတော်အနီးတစ်ဝိုက်၌ လှည့်လည်ဖူးမြော်ရင်း လိစ္ဆဝီမင်းသား သုနက္ခတ် အကြောင်းကို စဉ်းစားမိသေးသည်။ သုနက္ခတ်ကား ဘုရားရှင်၏ နောက်တော်မှ လိုက်ပါ၍ လုပ်ကျွေးပြုစုခွင့်ရပါလျက် ဘုရားရှင်ထက်ပင် အဝတ်မဝတ်သော ဂျိန်းဘုန်းကြီးကို ပို၍ကြည်ညိုသူဖြစ်သည်။ သုနက္ခတ်သည် ရဟန်းပြု၍ တရားအားထုတ်ရာ ဒိဗ္ဗစက္ခုအဘိညာဉ်(နတ်မျက်စိကဲ့သို့ မြင်နိုင်သောဥာဏ်)ကို ရရှိခဲ့သော်လည်း အတိတ်ဘဝတစ်ခုက ပြုခဲ့မိသည့် အကုသိုလ်ကံကြောင့် ဒိဗ္ဗသောတအဘိညာဉ်ကို မရရှိနိုင်ခဲ့ပေ။ ထိုအဆင်မပြေမှုကို အကြောင်းပြု၍ ဘုရားရှင်အပေါ် အထင်လွဲကာ မကျေမနပ်ဖြစ်ပြီး လူထွက်သွားခဲ့သည်။ လူထွက်သွားပြီးနောက် လူစည်ကားသော နေရာများ၌ လှည့်လည်၍ “ရဟန်းဂေါတမမှာ လောကုတ္တရာတရားထူး ဘာတစ်ခုမျှမရှိ၊ သူဟောတဲ့တရားတွေဟာ စိတ်ကူးထဲမှာ ပေါ်လာတာတွေကို ဟောပြထားတာဖြစ်တယ်”ဟု စွပ်စွဲခဲ့သူဖြစ်၏။ အရှင်သာရိပုတ္တရာက ဆွမ်းခံရင်းကြားသိလာသဖြင့် ဘုရားရှင်ကို လျှောက်ထားသည်။ ဘုရားရှင်က ဂုဏ်တော်ကိုးပါး၊ ရဲရင့်ကြောင်းဖြစ်သော ဝေသာရဇ္ဇဥာဏ်တော်လေးပါး၊ လားရာဂတိငါးမျိုးကို ပိုင်းခြားသိမြင်နိုင်သော ဥာဏ်တော်ငါးပါး၊ ပဋိသန္ဓေလေးမျိုးကို ပိုင်းခြားသိမြင်နိုင်သော ဥာဏ်တော်လေးပါး၊ အဘိညာဉ်ခြောက်ပါး၊ ပရိသတ်ရှစ်ပါး၌ ရဲရင့်ကြောင်းဖြစ်သော ဥာဏ်တော်ရှစ်ပါး၊ ဥာဏ်တော်စွမ်းအား ဆယ်ပါး--- စသည်တို့ကို ထုတ်ဖော်ဟောပြတော်မူပြီး သုနက္ခတ်ကြည်ညိုသော ဂျိန်းဘာသာဝင်တို့၏ အကျင့်များကို အလောင်းတော်ကိုယ်တိုင် အတိတ်ဘဝက အားထုတ်ခဲ့သော်လည်း လောကုတ္တရာ တရားထူးကို မရခဲ့ပုံ၊ ထိုအကျင့်များ ဘာတစ်မျှ အကျိုးမရှိပုံတို့ကို ဝေဖန်ပြတော်မူကာ “အသက်အရွယ်အိုမင်းလွန်း၍ ငါ့ကို ကုတင်ညောင်စောင်းဖြင့် ထမ်း၍ ခေါ်ဆောင်သွားရစေကာမူ ငါ၏သဗ္ဗညုတဥာဏ်တော်သည် ဆုတ်ယုတ်ပျက်ပြားမှု လုံးဝမရှိနိုင်၊ လူနတ်ဗြဟ္မာသတ္တဝါအပေါင်းတို့၏ ကောင်းကျိုးကို သယ်ပိုးရွက်ဆောင်တတ်သော တွေဝေမှုကင်းစင်သည့် ပုဂ္ဂိုလ်တစ်ဦး လောက၌ ပေါ်ပေါက်ခဲ့ဖူးပါသည်ဟု တစ်စုံတစ်ယောက်က ပြောဆိုခဲ့လျှင် ငါ့ကို ရည်ညွှန်း၍ ပြောဆိုမှသာ မှန်ကန်သောပြောဆိုမှုဖြစ်နိုင်ကြောင်း” ရဲရဲတောက်မိန့်ဆိုလျက် “မဟာသီဟနာဒ”သုတ်ကို ဟောပြတော်မူခဲ့သည်။ သာသနာတော်နှင့် ဆုံစည်းခွင့်ရခဲ့ပါသော်လည်း သာသနာတော်၏ တန်ဖိုးကို မသိတတ်သဖြင့် သာသနာနှင့် တွေ့ရကျိုးမနပ်သူ သုနက္ခတ် အပေါ် သံဝေဂယူမိပါ၏။


ဝေသာလီမဟာဝုန်တော ကူဋာဂါရကျောင်းတော်ရာကို ဖူးမြော်ပြီးနောက် လိစ္ဆ္တဝီမင်းများက ဘုရားရှင်၏ ဓာတ်တော်များကို စေတီတည်ထားခဲ့သောနေရာသို့ သွားရောက်ဖူးမြော်ကြသည်။ စေတီအုတ်မြစ်မျှသာ ကြွင်းကျန်တော့ သည့်နေ့ရာကို သွပ်မိုးအဝိုင်းကြီးပြုလုပ်၍ သံဇကာ ကာရံထားသည်။

လိစ္ဆဝီမင်းများက ၎င်းတို့၏ ဝေစုရဓာတ်တော်များ ကို ဌာပနာ၍ စေတီတည်ထားသော နေရာဖြစ်၍ သမိုင်းဝင်ဌာနတစ်ခုဖြစ်သော်လည်း ဖူးမြော်စရာနေရာ သိပ်မရှိ၊ အနီးနားတွင် လိစ္ဆဝီရေကန်နှင့် ဂျပန်စေတီတော်ရှိသည်။

ထိုရေကန်သည် ဗန္ဓုလစစ်သူကြီး၏ဇနီး မလ္လိကာ ချင်ခြင်းဖြစ် သဖြင့် အစောင့်အကြပ်များကြားမှ ရအောင်ဝင်ရောက်၍ သောက်သုံးစေခဲ့သော ရေကန်ဖြစ်သည်ဟု ယူဆထားကြသည်။ အနီးနားတွင် ဈေးဆိုင်တန်းများရှိပြီး ပစ္စည်းများမှာလည်း စုံလင်သည်။ အသောကကျောက်စာတိုင် ပန်းပုရုပ်တုများကို ဝေသာလီတွင် ဈေးအသက်သာဆုံးဖြင့် ရနိုင်သည်။



ဦးဉာဏ(ကြွယ်အိပ်ပွဲ)၏
သူရဇ္ဇ ဖေ ၂၀၁၅ တွင်ဖော်ပြပြီး
သည်ကို ကူးယူခြင်းသာ



အသောကကျောင်းတော်ရာ၊ တတိယသင်္ဂါယနာတင်ရာ သာသနာပြုဗဟိုဌာနချုပ် ပါဋလိပုတ်

ဝေသာလီတွင် လှည့်လည်ဖူးမြော်ပြီးနောက် ဗီဟာပြည်နယ်၏ မြို့တော်ဖြစ်သော 
ပတ္တနားမြို့(ပါဋလိပုတ်)သို့ ခရီးဆက်ကြသည်။ ပတ္တနားမြို့သို့ အဝင်တွင် ဂင်္ဂါမြစ်ကို ဖြတ်၍ဆောက်လုပ်ထားသော (၇)ကီလိုမီတာရှည်သည့် မဟတ္တမဂန္ဒီတံတားကြီးကို ဖြတ်ကြရသည်။ ဂင်္ဂါမြစ်ကို ဖြတ်ကျော်စဉ် မဟာပရိနိဗ္ဗာနသုတ်ကို အမှတ်ရမိသည်။ ပါဋလိပုတ်မြို့ကား ဘုရားရှင်လက်ထက်တော်အခါက နယ်ခြားမြို့ကလေးမျှသာဖြစ်သည်။ မြို့သစ်တည်ရာ၌ ဘုရားရှင် နှင့် သံဃာတော်များကို စည်းဝေးခန်းမဆောင်၌ တစ်ညတာသီတင်းသုံးစေပြီး တရားနာယူကြသည်။ ဘုရားရှင်က ဤပါဋလိမြို့သည် နောင်တစ်ချိန်တွင် ကုန်စည်ကူးသန်းရောင်းဝယ်မှုပြုရာ အချက်အချာအကျဆုံး မြို့ကြီးဖြစ်လာလိမ့်မည်။ ဤမြို့၌ မီးဘေး၊ ရေဘေး၊ အချင်းချင်းကွဲပြားသောဘေးတို့ ကြုံရလိမ့်မည်ဟု အရှင်အာနန္ဒာကို ဗျာဒိတ်စကား မိန့်ကြား တော်မူခဲ့သည်။ ဘုရားအမှူးရှိသော သံဃာတော်များကို သုနိဓနှင့် ဝဿကာရ အစရှိသည့် မဂဓအမတ်ကြီးများက ဆွမ်း ကပ်လှူကြသည်။ ဆွမ်းကပ်လှူပြီး ဘုရားရှင်ပြန်ကြွတော်မူသောအခါ ဘုရားရှင်ထွက်တော်မူရာတံခါးကို ဂေါတမတံခါးဟု အမည်တွင်စေမည်။ ဘုရားရှင်တစ်ဘက်ကမ်းသို့ ကူးတော်မူရာ ဆိပ်ကမ်းကို ဂေါတမဆိပ်ကမ်းဟု အမည်တွင်စေမည်ဟု ရည်ရွယ်၍ ဘုရားရှင်နောက်တော်မှ အမတ်ကြီးများ လိုက်ပါလာကြသည်။ ဘုရားရှင်က လှေဖောင်ဖြင့် ကူးတော်မမူဘဲ ရဟန်းသံဃာများကိုပါ တန်ခိုးတော်ဖြင့် ခေါ်ဆောင်တော်မူသည်။ လှေဖောင်ဖွဲ့နေသူများကို ဘုရားရှင်မြင်တော်မူ၍  “ယေ တရန္တိ အဏ္ဏဝံ သရံ” အစရှိသော ဂါထာဖြင့် ဥဒါန်းကျူးရင့်တော်မူသည်။ မြတ်စွာဘုရား ကြွသွားတော်မူရာနေရာကို “ဂေါတမဆိပ်ကမ်း”ဟု အမည်ပေးထားခဲ့ရာ ယခုထိ အမည်တွင်နေဆဲ ဖြစ်သည်။ ပါဋလိပုတ်မြို့သည် ဘုရားရှင်၏ ဗျာဒိတ်တော်အတိုင်း အသောကခေတ်တွင် မင်းနေပြည်တော်ကြီး ဖြစ်လာခဲ့သည်။
မိမိတို့အဖွဲ့ ပတ္တနားမြို့တွင်းသို့ ဝင်ရောက်လာပြီးနောက် အသောကမင်းကြီး ဆောက်လုပ်လှူဒါန်းခဲ့သော အသောကာရုံကျောင်းတော်ရာကို ကားပေါ်မှပင် ကြည့်ရှုလေ့လာကြသည်။ အများအပန်းဖြေရာ ဥယျာဉ်မျှသာ ကျန်ရစ်ပြီး အပိုင်းပိုင်း ကျိုးပဲ့နေသော အသောကမင်းကြီး၏ ကျောက်စာတိုင်ကို အမိုးအကာအောက်တွင် ထိန်းသိမ်းထားသည်။ အသောကမင်းကြီးလက်ထက်က ဤနေရာသည် တတိယသင်္ဂါယနာတင်ရာ နေရာဌာနဖြစ်ခဲ့ပြီး သာသနာတော်အတွက် အလွန်အရေးပါသော နေရာတစ်ခုဖြစ်ခဲ့သည်။ အရှင်မဟာမောဂ္ဂလိပုတ္တတိဿမထေရ် အမှူးပြုသည့် ထောင်ပေါင်း များစွာသော ရဟန္တာကြီးများ သီတင်းသုံးတော်မူရာဌာနဖြစ်ခဲ့ပြီး ကိုးတိုင်းကိုးဌာနသို့ သာသနာပြုအဖွဲ့များ စေလွှတ်၍ ဗုဒ္ဓသာသနာကို ဖြန့်ချီရာ ဗဟိုဌာနချုပ်ကြီးဖြစ်ခဲ့၏။ ဗုဒ္ဓသာသနာတော်ကို အိန္ဒိယနိုင်ငံ၏ ပြင်ပသို့ ဖြန့်ချီနိုင်ခဲ့ပြီး ကမ္ဘာ့ဘာသာကြီးများစာရင်းဝင် ဘာသာတစ်ခုအဖြစ်သို့ ရောက်ရှိအောင်စွမ်းဆောင်နိုင်ခဲ့သည်။ ယနေ့မြင်တွေ့ နေရသော မြန်မာ့သာသနာသည်ပင် အသောကာရုံကျောင်းတော်ကြီး၏ ကျေးဇူးကြောင့်ပင်ဖြစ်သည်။ သာသနာတော် အတွက် ဤမျှကျေးဇူးများသော နေရာဌာနသည်ပင်လျှင် ယနေ့အချိန်၌ ဥယျာဉ်တစ်ခုမျှသာ ကြွင်းကျန်တော့သည်ကို သံဝေဂ ယူမိပါတော့သည်။

အသောကာရုံကျောင်းတော်ကြီးကို ကြည့်ရှုလေ့လာပြီးနောက် ဆက်လက်ထွက်ခွာလာရာ မကြာမီ မြန်မာ ကျောင်းသို့ ရောက်ရှိသည်။ လူနေရပ်ကွက်အလယ်တွင် တည်ရှိပြီး စီးပွားနှင့်ကူးသန်းဝန်ကြီးဌာနက ဦးစီး၍တည် ဆောက်ထားသော ကျောင်းဆောင်ကြီးနှင့် သိမ်တော်ကြီးတည်ရှိသည်။ ကျောင်ဆောင်ကြီး၌ ဓာတ်လှေကားရှိသဖြင့် ဆင်းရတက်ရ အဆင်ပြေသည်။ အခြားဘုရားဖူးအဖွဲ့များနှင့် မဆုံသဖြင့် မိမိတို့တစ်ဖွဲ့တည်း အေးအေးဆေးဆေး တည်းခိုကြရသည်။ ကျောင်းရှေ့အနီးနားတွင် မီးရထားဘူတာရုံရှိသည်။ အိန္ဒိယတွင် ခရီးသည်များက မီးရထားကိုသာ အဓိကထား၍ သွားလာကြကြောင်း သိရသည်။ ခရီးသည်များ အလွန်များပြီး မီးရထားကလည်း မိနစ်ပိုင်းမျှသာ ကွာခြား၍ တစ်စင်းပြီးတစ်စင်း ဆိုက်ရောက်လာကြသည်။ ခရီးသည်များ အပြေးအလွှားဖြင့် အဆင်းအတက် ပြုလုပ်နေကြ သည်မှာလည်း ကျွက်ကျွက်ညံနေတော့သည်။
ပတ္တနားမြို့တွင် တစ်ညတာတည်းခိုခိုက် အသောကခေတ် ဗုဒ္ဓသာသနာတော်ကို မှန်းမျှော်ကြည့်မိသည်။ 

ရာဇဝင်သမိုင်းဆရာများက အသောကမင်းကြီးကို ကမ္ဘာ့သမိုင်းတွင် ထင်ရှားခဲ့သော ဧကရာဇ်မင်းများအနက် အထွန်းတောက်ဆုံးသော ကြယ်ပွင့်ကြီးအဖြစ် ချီးကျူးခဲ့ကြသည်။ အိန္ဒိယနိုင်ငံသမိုင်း၌ အသောကမင်းကြီး အုပ်ချုပ်သော ခေတ်သည် အေးချမ်းသာယာသောခေတ်ဖြစ်ခဲ့ကြောင်း သမိုင်းဆရာများ အသိအမှတ်ပြုကြသည်။ ဗုဒ္ဓဘာသာကို ကိုးကွယ်သူဖြစ်သော်လည်း အခြားဘာသာတရားများကို နှိမ့်ချခြင်း၊ ကဲ့ရဲ့ရှုတ်ချခြင်းမပြုဘဲ လေးစားခဲ့သည်။ သဘော ထားကြီးခဲ့သည်။ စေတီပုထိုး၊ ကျောင်း၊ ရေတွင်းရေကန်များ များပြားစွာတည်ထားခဲ့ပြီး အရိယာပုဂ္ဂိုလ်များလည်း ကုဋေနှင့်ချီ၍ များပြားခဲ့သည်။ ဗုဒ္ဓသာသနာတော်၏ ရွှေခေတ်ဖြစ်ခဲ့သည်။ သာသနာတော်ကို နေရာအနှံ့ပြန့်ပွားအောင် ဆောင်ရွက်နိုင်ခဲ့သည်။ ထိုမျှလောက် ထွန်းကားပြန့်ပွားခဲ့သော သာသနာတော်၏ အခြေအနေများကို ယနေ့ခေတ် အခြေအနေနှင့် နှိုင်းယှဉ်ကြည့်လျှင် ယုံနိုင်ဖွယ်ရာပင်မရှိပေ။

သာသနာတော်၏ ဆန့်ကျင်ဘက်အန္တရာယ်များကို လျှော့မတွက်သင့်။ ၎င်းတို့ဘက်မှ အကွက်ကို အမြဲချောင်း နေကြသည်။ အခွင့်သာသည်နှင့်တစ်ပြိုင်နက် အနုနည်း၊ အကြမ်းနည်းတို့ဖြင့် နည်းမျိုးစုံသုံးကာ ဗုဒ္ဓသာသနာတော် ကွယ်ပျောက်အောင် ပြုလုပ်ခဲ့ကြသည်။ ဗုဒ္ဓသာသနာတော် ကွယ်ပျောက်သွားခဲ့သော နေရာများ၌ ပြန်လည်ဝင်ရောက် နေရာယူရန် မည်မျှခဲယဉ်းကြောင်းကို ယနေ့ခေတ် အိန္ဒိယနိုင်ငံ၌ သာသနာပြုနေသော ဆရာတော်များ အသိဆုံးပင် ဖြစ်သည်။ ဗုဒ္ဓဘာသာဝင်များ အထွတ်အထိပ်သို့ ရောက်ရှိနေချိန်၌ ဘာသာခြားများကို နှိပ်ကွပ်မှု လုံးဝမရှိကြောင်း ရာဇဝင် သမိုင်းဆရာများ အသိအမှတ်ပြုထားကြသည်။ ဗုဒ္ဓသာသနာတော်ဘက်က သဘောထားကြီးခဲ့သလောက် ၎င်းတို့ဘက်မှ ဘယ်သောအခါမျှ သက်ညှာမှုမရှိခဲ့ကြ။ အပြုတ်နှံခဲ့ကြသည်သာဖြစ်၏။ ဤအချက်ကိုလည်း အလေးအနက်ထား စဉ်းစားသင့်ပါသည်။ အိန္ဒိယသာသနာ့သမိုင်းကို သင်ခန်းစာယူ၍ မြန်မာ့သာသနာအတွက် အမြဲမပြတ် သတိချပ်ကာ ဆရာ၊ဒကာ စည်းလုံးညီညွတ်စွာ ကြိုးပမ်းကြရမည့် အချိန်အခါ ဖြစ်ပါသည်။ သာသနာတော် အရှည်တည်ရေးကား အာဏာစက်ဖြင့် သာသနာတော်ကို ကာကွယ်စောင့်ရှောက်မှုပေးနိုင်သော မင်းအစိုးရ၊ သာသနာ့ဝန်ထမ်း ရဟန်းသံဃာနှင့် ချီးမြှောက်ထောက်ပံ့သူ ဒါယကာ၊ ဒါယိကာမတို့အပေါ်၌ မူတည်၏။ ထိုသုံးဦးသုံးဘက်လုံး သာသနာတော်အတွက် လက်တွဲကာ တာဝန်ကျေကျေ ကြိုးပမ်းနိုင်ကြပါစေကြောင်း ဆုတောင်းမိပါ၏။




No comments:

Post a Comment